ممكن تبقى برنس ومهاراتك عالية وكلمتين بس يضيعوا منك الوظيفة كلها فى المقابلة الشخصية , و ممكن تبقى محضر نفسك جدااا وتنسى حاجه مهمة , فتقع من نظر المحاور علشان كده , دول اخطر الأخطاء اللى ممكن تعملها فى الإنترفيو وبعرضه إعرف أهم 9 نصائح للتحضير للـ إنترفيو علشان تعدى سليم – مجتهد
طب اية بقى اخطر الأخطاء اللى ممكن تعملها فى الإنترفيو : –
1 – التركيز على نفسك فى المقابلة الشخصية
الشركة اللى انت هتعمل فيها الإنترفيو , مش جايباك علشان انت برنس وجامد جدااا , بس علشان هى عايزه تعمل شغل معين وتعين انسب واحد فى الشغل ده ,
علشان كده متقعدش تتكلم طول الإنترفيو عن نفسك وإنجازاتك , و تنسى تتكلم عن انك إزاى هتفيدهم لما هيشغلوك , وهل انت هتعرف تعمل الشغل اللى هم طالبينة منك ولا لأ
2 – عدم التفكير بعض الوقت فى إجابتك
صحيح فيه بعض الأسئلة مش محتاج انك تفكر علشان تقولها فى المقابلة الشخصية , بس بعض الأسئلة التانية انت محتاج تفكر فيها , وإلا هتبان قدام المحاور انك حافظ مش فاهم , وانك صحيح حضرت للإنترفيو لدرجة انك حفظت الأسئلة والأجوبة , وهيتأكد كمان ان دى مش شخصيتك الحقيقية وإنك بتتصنع إنك فاهم وانك فعلا مش فاهم أى حاجه
3 – الدوران حول الإجابة المطلوبة
يعنى انك تحور على المحاور , وهنا بقى انت نسيت انه قعد قدام مليون واحد قبلك وانه فاقسك , وساعتها هيشك انك كداب و انك مش زى ما بتصورلة وبتشرحلة , وهنا هو هيحاول يقصر الإنترفيو وهيقولك هنتصل بيك ان شاء الله , وساعتها اعرف انك تلحق تقدم فى شركة تانية بسرعة
4 – عدم فهم الشركة أو طبيعيتها
وده لما واحد صاحبك يقولك تعالى وانا اشغلك ويدخلك الشركة وانت مش فاهم اى حاجه فى أى حاجه , وساعتها المحاور يسألك وانت مش عارف حاجه , أو تكون مقدم فى 100 شغلانة ويجيلك تليفون لإنترفيو ومتعملش سيرش على الشركة وتروح وانت مش فاهم الشركة دى اصلا بتبيع ايه , وساعتها برضه هيبان انك مش مهتم , أو بتضيع وقت وخلاص , وهنا ممكن تترفض فى الإنترفيو من قبل أما يبدأ اصلاً
حاول جداا تعرف الشركة اللى رايحها , وتكون دارسها وعارفها كويس وعارف ( مجال الصناعة – رئيس مجلس الإدارة – الهيكل الوظيفى – الملابس الرسمية للشركة ….. الخ )
5 – إنك توصل متأخر
وهنا دى لوحدها كارثة , يعنى انت متوقع إزاى انك شغلك يخلص والمتقدم للوظيفه جايلك اصلا متأخر
, وهنا من حق الشركة انها تلغى الإنترفيو أصلا , وتترفض بجد من غير اما يشوفوك اصلا
6 – التقدم لوظائف مختلفة فى نفس الوقت
مبدأيا ده هيلغبطك جدااا , تخيل انك رايح الشركة ومحضر انترفيو وظيفة مبيعات وهم قرروا يوظفوك كـ ريسيبشن
والغلطة الأكبر إنك تبقى باعت ال C.V وكاتب انك نفسك تغير مجال المحاسبة وهم محتاجين وظيفة تسويق
7 – التحدث حول الراتب أولاً
هقبض كام ؟؟! هاه هاه هقبض كام ؟!! – ماترد عليا هقبض كام ؟!!
وهنا هيبان انك مادى جدااااا وانك ممكن تسيب الشركة بكل سهولة لو فيه شركة تانية هتدفع مليم زيادة , وهيخاوفوا اصلا انهم يوظفوك
8 – التكبر
اللى هو (( قبلتونى , كان بها , مقبلتونيش يبقى خسرتوا فنان مبدع )) , المحاور قدامه 100 واحد غيرك ممكن يعمل معاهم انترفيو ,
فمتتخيلش انك لما تقول كده فإنت واثق كده من نفسك , وده لأن الفرق بين ( الثقة بالنفس – الغرور ) فرق صغير جدااااا
9 – عدم طرح الأسئلة
خليك شغوف وأسأل عن الشركة , والهيكل بتاعها وحسسهم انك مهتم بالشركة دى بالذات ومهتم إنك تشتغل وإنك طموح
10 – تجاهل لغة الجسد
المحاور اللى بيعمل اللإنترفيو شاف ناس كتير ودرس لغة جسد , فتجنب لغة الجسد اللى تدل انك مش مهتم زى تشابك الأيدى , أو انك مختلف فى الرأى فى تشابك الأرجل و ( ابعد عن اى تشابك فى اى حاجه ) , هزة الأرجل العنيفة لأنها بتدل على التوتر الشديد والقلق , خلى بالك من ملامح وشك وفكها خليك مرح متبقاش مكتئب
11 – الملابس الغير مناسبة
انت مش رايح فرح , ( للشباب ) , اكيد متروحش بشورت أو بنطلون الموضة المقطع , أو تسريحة الشعر الأوفر
(( للبنات )) الميك أب ميكونش أوفر – الملابس مش ملونة احمر واصفر واخضر والألوان الفاقعه ( مش فرح والله )
سواء ولد أو بنت – البس/ى فورمال – ويفضل يكون الملابس أقرب لملابس الشركة الرسمية ونفس اللون
وأخيراً # عافر